Cebuano News: Mga lakang nga gibuhat sa syudad sa Tagbilaran batok sa COVID-19, gidayeg

TAGBILARAN CITY, Oct. 19 (PIA) -- Gidayeg ang mga lakang nga gibuhat sa gitawag nga “City of Friendship” ug giila isip “Most Business Friendly City, ang syudad sa Tagbilaran batok sa coronavirus disease (COVID-19) pandemic.

Sa pagkakaron, walay natala nga namatay sa COVID-19 sa syudad ug naa sa labaw sa 90% nga recovery rate ang gamay ra nga kaso sa maong makamatay nga sakit.

UBAN SA MGA SAKOP SA MEDIA. Si Tagbilaran City Mayor John Geesnell Yap migamit usab sa iyang katakus sa information technology sa pagpakatap sa mga dinalian nga kasayuran sa ilang vlogs uban sa iyang anak ug sa mga social cards nga ilado ang syudad. (rahc/PIA-7/Bohol file photo) 

Sa gipahigayong Network Briefing on COVID-19 nga gipangunahan ni Presidential Communications Operations Office (PCOO) Kalihim Martin Andanar Biyernes sa buntag, gibutyag ni Tagbilaran City Mayor John Geesnell “Baba” Yap II nga ang sayo nga estriktong pag-implementar sa lockdown aron daling mapugngan ang pandemya ang rason nga gamay ra ang mga kaso dili lamang sa syudad, apan lakip na sa tibuok lalawigan sa Bohol.

“In order to promptly contain the virus, the local government of Tagbilaran City immediately ordered a lockdown on March 16. We suspended classes and curfew was ruled until 9:00 p.m. Large gatherings were prohibited like weddings, birthday parties, and fiesta celebrations and imposed home quarantine strictly allowing only one person per household to have a quarantine pass to go out for basic necessities,” matud pa ni Yap.

Sa pagkakaron, may 53 ka natalang kaso sa COVID-19 sa syudad diin 49 o katumbas sa 92% sa mga positibong kaso ang nangaayo na.

Duha lamang niini ang aktibong kaso: usa ka Locally Stranded Iindividual ug laing usa ka authorized person nga mingbyahe outside residence, segun sa BIATF,

Matud pa ni Yap nga ang lokal nga kagamhanan nihatag og suporta sa mga medical frontliners pinaagi sa paghatag og mga personal protective equipment, libreng flu vaccination ug libreng pagpasakay tungod kay mihunong man sa operasyon ang mga pampublikong transportasyon.

Gidugang pa sa batan-ong mayor nga may libreng transportasyon usab ang gihatag sa mga pasyenteng nag-dialysis nga kinahanglang moadto sa mga tambalanan o sa mga medical facilities alang sa ilang regular nga pagpatambal.

Kauban sa SK Federation sa syudad, nagmugna og online shopping platform ang kagamhanang syudad aron dali lamang alang sa mga ginsakupan niini nga makapalit sa mga grocery items, nga usa usab sa paagi nga nagpugong sa katawhan sa paggawas sa ilang mga panimalay aron mamalit.

Si Yap mibutyag nga gipasiugdahan usab sa kagamhanang syudad ang ‘Balay to Balay Health Check-Up,’ nga nagdala sa mga doktor direkta sa mga pultahan sa mga residente aron dili na kini kinahanglan pang mogawas aron magpa konsulta.

Aron mapanalipdan ang mga daling matakdan sa sakit, nihatag usab ang syudad og libreng vaccine shots ngadto sa mga senior citizens ug lakip na usab sa mga frontliners sama sa police, jail personnel ug mga kawani sa city hall.

Gipadayon usab ang regular nga pag-disinfect sa mga pampublikong lugar sama sa mga plaza ug sidewalks, matud pa ni Yap.

Gibutyag usab sa mayor nga aron pagseguro nga magpabiling luwas ang lalawigan, ang kagamhanang syudad nihatag og libreng COVID-19 RT Polymerase Chain Reaction (PCR) Test ngadto sa mga locally stranded individuals ug namalik nga overseas Filipino workers sa dili pa papaulion gikan sa mga quarantine facilities.

Kalabot sa food relief assistance, miingon si Yap nga ang lokal nga kagamhanan sa syudad nakahatag og tagsa ka sakong bugas nga tag 50 ug 25 kilo gawas pa sa mga grocery items nga gipangapud-apod sa upat ka bugso.

Samtang kalabot usab sa paghatag og dekalidad nga edukasyon, ang syudad nakig-partner sa Tagbilaran City College (TCC) sa paghatag og libreng pocket wifi ug P300 matag buwan nga load ngadto sa mga estudyante sa kolehiyo sa maong tunghaan alang sa ilang online nga klase.

Karong gipaubos na sa modified general community quarantine status ang tibuok lalawigan, gibutyag sa mayor nga hinay-hinay nang nagbukas ang mga business establishments sa syudad sa Tagbilaran, apan gipatuman ang hugot nga health protocols aron mapabilin ang ubos nga kaso sa COVID-19 sa lokalidad.

Gi-awhag sa batan-ong mayor ang publiko sa paghimo sa health protocols isip ‘daily habit’ ug dili kalimtan ang kanunay nga pag-ampo aron daling matapos na kining pandemya. (ecb/PIA7-Bohol)

source https://pia.gov.ph/news/articles/1056214