Provincial Population Office mitabang paglikay sa wala giplanong pagmabdos

MISAMIS ORIENTAL, Agosto 16 - Daghang lakang ang gihimo karon sa Provincial Population Office aron makontrolar ang unwanted pregnancies dinhi sa lalawigan sa Misamis Oriental labina taliwala niining nasinati nga pandemya hatod sa Corona Virus Disease (Covid-19).

Bisan paman gilantaw sa mga eksperto ang hisgutanan sa panglawas nga posibleng motaas ang pagsaka sa insidente sa ‘unwanted pregnancies’ o di planado nga pagmabdos tungod sa stay at home protocol karun nga adunay pandemya, nagpabiling andam ug aktibo ang Provincial Population Office sa ilang kampanya kalabot sa responsableng pagkaginikanan o responsible parenthood.

Matud ni Mr. Andrew Gapuz, ang Head sa PPO nga mas gipakusgan pa karun sa PPO ang ilang kampanya sa pagpahimangno sa katawhan sa probinsya arun malikayan ang dili planadong pagburos labina karun nga sila anaa lamang sa balay.

Dugang niini, bag-o lamang sila nanghatag sa contraceptives sama sa condom ug pills sa mga magtiayon sa lima ka pilot Municipalities nga mao ang lungsod sa Lugait, Manticao, Claveria, Jasaan ug Tagoloan.

Kini kabahin sa gihingusgan nga Responsible Parenthood and Family Program.

Nagbalik na usab og panghatag ang buhatan sa libre nga implants alang sa mga kababayen-an nga gusto maglikay sa pagmabdos sulod sa tulo ka tuig.

Sa pakig alayon usab sa Commission on Population and Development Region X gapaningkamotan sa PPO ang pagkumbinse sa mga magtiayon nga likayan ang unwanted pregnancy.

Katabang sa buhatan ang mga Barangay Population Volunteers (BPV) ug Municipal Population Officers (MPO) nga gamonitor ug gapahigayon sa mga information education campaign mahitungod sa family planning.

Usa ang lungsod sa Claveria sa mga ehemplo sa maong kalihokan.

Matud ni Ms. Sigrid dela Cruz, Municipal Population Officer sa Claveria nga na-train na ang mga Baranggay Health Workers ug Barangay Population Volunteers sa lungsod sa pagkumbinsi ug pagpahibalo sa mga magtiayon sa insakto nga ‘spacing’ ug insakto nga pagplano sa pamilya tungod kay gitutukan kini sa mga, BPV, mga midwife, ug BHWs.

Dili usab makapugong ang giatubang nga pandemya sa padayun nga serbisyo sa PPO labina nga adunay dakong risgo nga dala ang pagpanganak sa mga ospital labina niining panahon sa pandemya nga malayo sa virus ang magmabdos.

Naghangyo usab si PPO Head Gapuz nga sa panahon sa pandemya, mahimo unta nga maglikay sa dili protektadong pakighilawas aron malikayan ang dili planado nga pagmabdos, giaghat sab niini ang mga magtiayon nga mobisita sa Municipal Population Office ug Municipal Health Officer alang sa libre nga pamaagi sa family planning.

source https://pia.gov.ph/news/articles/1050467