Bagong ‘dine-in’ guidelines sa panahon ng pandemya sa Makati, inihayag ng alkalde

LUNGSOD CALOOCAN, Aug. 22 (PIA) -- Inanunsyo nitong Biyernes ni Makati City Mayor Abby Binay ang bagong guidelines ukol sa ‘dine-in’ services na ipapatupad sa tuwing isasailalim sa state of calamity, public health emergency o katulad na emergency declarations ang lungsod ng Makati.

Ani Mayor Abby, sisimulang ipatupad sa August 31, 2020 ang City Ordinance No. 2020-165 na ipinasa ng Sangguniang Panlungsod nitong Miyerkules kaugnay ng layuning maagap na pigilan ang pagkalat ng mga nakakahawang sakit, pandemya, epidemya, at iba pang uri ng outbreak sa lungsod.

Kaugnay nito, hinimok ng alkalde ang mga may-ari ng mga food business na may dine-in services na mahigpit na sumunod sa mga itinakdang alituntunin ng ordinansa. Kabilang dito ang mga restaurant, fast food establishments, canteens, food courts, food parks, karinderya at iba pang kainan na may dine-in services.

Paliwanag niya, isinusulong ng ordinansa ang kaligtasan ng mga mamamayan at iba pang mga kostumer, pati na ang kapakanan ng mga empleyado ng food establishments sa lungsod.

"Bagamat nauunawaan ng pamahalaang lungsod na kailangan nilang kumita upang malagpasan ang krisis, mangingibabaw pa rin ang kahalagahan ng kalusugan at kaligtasan ng publiko," diin ni Binay.

Batay sa ordinansa, mahigpit na ipinagbabawal ang dine-in services kapag ang lungsod ay nasa ilalim ng Enhanced Community Quarantine.

Kapag nasa Modified Enhanced Community Quarantine (MECQ), maaaring mag-operate nang hanggang 30 porsiyento ng dine-in services, sa kondisyong mahigpit na maipatupad ang minimum public health standards, social distancing protocols, at mga karagdagang guidelines na itinakda ng ordinansa.

Sa ilalim naman ng General Community Quarantine (GCQ), papayagan ang hanggang 50 porsiyento ng dine-in services, kasabay ng mahigpit na pagsunod sa mga itinakdang pamantayan, protocols at guidelines patungkol sa COVID-19. Para sa Modified General Community Quarantine, papayagan ang hanggang 75 porsiyento ng dine-in services na may katulad na mga kondisyong nabanggit.

Nakasaad din sa ordinansa ang karagdagang safe dining guidelines, tulad ng paglalagay ng rubbing alcohol o hand sanitizers sa entrance ng mga establisyimento para magamit ng mga empleyado, supplier, at kostumer bago sila pumasok. Mahigpit ding ipapatupad ang “no face mask, no entry” policy, kasama ang thermal scanning ng lahat ng pumapasok sa estalisyimento. Ang mga taong may temperaturang mataas sa 37.5 degrees Celsius ay hindi maaaring papasukin.

Ang mga lalabag sa ordinansa ay papatawan ng parusa ayon sa sumusunod: Temporary closure for three days at multang P5,000 sa first offense; at P5,000 at isang buwang temporary closure sa second offense. Ang ikatlo at mga susunod na paglabag ay papatawan ng pagkakasara nang hindi lalagpas sa isang taon, kasama ang P5,000 multa, o pagkakabilanggo nang hindi lalagpas sa isang taon, o parehong ipapataw ayon sa desisyon ng korte.

Mahigpit ding ipinagbabawal ng ordinansa ang pagbubukas ng mga bar sa mga panahon ng kalamidad o emergency.

Pinapayagan naman ng ordinansa ang pag-serve ng lahat ng uri ng pagkain at inumin, kabilang ang alcoholic beverages, subalit nagtatakda ito ng maximum amount para sa bawat uri ng inumin na kasama ng pagkaing inorder na maaaring makonsumo sa loob ng dalawang oras.

Para sa wine, hanggang dalawang wine glasses lamang bawat tao, o maximum na isang 750 ml bottle ng wine para sa dalawang diners. Sa beer, hanggang dalawang pirasong tig-330 ml na bote, o dalawang basong beer na katumbas ng nasabing volume bawat kostumer. Para sa ibang inumin tulad ng cocktail, hanggang dalawang servings bawat kostumer ang pwedeng ibigay.

Ang pagkonsumo ng alcohol ng “in bulk”, “in pitchers”, “in buckets”, o “in cases” ay mahigpit na ipinagbabawal.

Tanging ang mga rehistradong food establishment lamang ang pwedeng mag-serve ng alcoholic drinks sa nabanggit na quantity kasama ang inorder na pagkain. Bawal bumili ang kostumer ng pagkain sa labas ng establishment upang ito ay kainin kasabay ng biniling alcoholic beverage. Hindi rin maaaring samahan ng alak o anumang alcoholic beverage ang pagkaing take-out.

Matatandaang ipinasa rin kamakailan ang City Ordinance No. 2020-152, na nagbabawal ng pag-inom ng alak sa labas ng sariling pamamahay sa panahon ng pandemya o katulad na krisis.

Ang mga lalabag dito ay papatawan ng multang P5,000 sa first offense; P5,000 o pagkakakulong nang hindi lalagpas sa isang buwan, o pareho, sa second offense; at P5,000 multa o pagkakakulong nang hindi lalagpas sa isang taon, o parehong ipapataw, sa ikatlo at mga susunod na offense. (PIA NCR)

source https://pia.gov.ph/news/articles/1051002