Cebuano News: Mga kabus sa Bohol, wala na’y madawat nga SAP2

CORTES, Bohol, June 12 (PIA) -- Kadto lamang mga banay nga nakadawat sa unang hugna sa dinaliang hinabang sa kagamhanan sa Social Amelioration Program (SAP) nga padayon pang natanggong sa mga lugar nga gipailawom sa Enhanced Community Quarantine (ECQ) ang makadawat sa ikaduhang hugna sa ayuda nga cash.

Kini segun sa Joint Memorandum Circular No. 2, series of 2020, nga naglatid sa hiniusang gabayan sa pagpatuman sa ikaduha nga hugna sa SAP, nga nalagdaan niadtong Hunyo 9, 2020.

MAGPAABUT PA. Nagpaabut pa ang lokal nga DSWD sa memorandum sa nasudnong kagamhanan kabahin sa SAP 2 aron opisyal pa usab nila n ga mapahibaw nagdto sa ilang mga kaubanan sa kalungsuran, matud ni DSWD SWAD bohol team leader Rhea Marie Tubingbanua sa Kapihan sa PIA. (PIA Bohol) 

Hinuon, milaum pa usab si Department of Social Welfare and Development Social Welfare and Development Team Leader Rhea Marie Tubongbanua nga opisyal na nila nga madawat ang memorandum aron opisyal na usab nila nga ikapasa ang balita ngadto sa ilang mga Municipal Social Welfare and Development Officers ug sa SAP Commitees sa kalungsuran.

Subay sa guidelines ug sa mandu ni Presidente Rodrigo Roa Duterte nga nahalakip sa Memorandum gikan ni Executive Secretary Salvador Medialdia niadtong Mayo 22, ang ika duha nga hugna sa SAP ipang-apud-apod sa mga benepisaryo nga banay sa una nga hugna sa SAP nga naa pa gihapon sa  ECQ.

Kini naglakip sa nasulod sa Executive Order No. 112, series of 2000 nga naglakip sa National Capital Region, Region 3 gawas sa Aurora, Region 4-A, Benguet, Pangasisnan, Iloilo, Cebi Province, Bacolod, Davao City ug kadtong naa sa Memorandum gikan ni Executive Secretary Medialdia nga naglakip sa Albay province ug Zamboanga City.

Wala man maapil ang Bohol dinhi, matud ni Tubongbanua, may pipila ka mga banay nga Bol-anon nga mahimong modawat sa ayuda nga nalangkob sa appropriations sa ikaduhang hugna sa nasudnong ayuda alang sa mga kabus ug ubos ang kita.

Kahinumduman nga ang Bayanihan to Heal As One Act nagmandu sa paghatag og dinali-an nga ayuda ngadto sa mga 18 milyones ka kabus ug ubos og kita nga mga banay, ug  ang gibanabana nga 5 milyones ka mga banay nga angayan unta nga makadawat sa ayuda apan nalaktawan sa sistema sa pagpili sa mga benepisaryo.

Didto sa Kapihan sa PIA niadtong Huwebes, gibutyag ni Tubongbanua nga dinhi sa Bohol, may giduso sila nga 30, 673 ka banay nga ilang gisugyot nga malakip na sa 5 milyones nga banay nga wala maapil sa unang hugna sa SAP.

Kini nga listahan, gikompleto ug gihimong opisyal na nga taho sa SWAD Bohol ngadto sa DSWD niadtong Hunyo 11, 2020, bisan pa nga may mga taho pa gikan sa mga kalungsuran nga nag-abut-abot pa.

Hinuon usab, dili pa mapiho sa SWAD Bohol team leader kon ang tanan nga naa sa listahan, mao ba usab tanan ang modawat sa P6 mil nga dinali-ang ayuda gikan sa kagamhanan.

Ato nga nga giduso ang listahan apan ang nasudnong kagamhanan na ang makasulti kon ang mga giduso nga listahan sa mga kabus sa Bohol nga nalaktawan sa unang SAP, malakip bas a gipahat nga 5 milyones ka mga banay nga nawani. (rahc/PIA-7/Bohol)

source https://pia.gov.ph/news/articles/1044600