Cebuano News: DENR minghagit: Salmot sa labing unang ‘Envlog’

MAY USA KA SEMANA PA. Alang sa 3-5 minutos nga video blog alang sa kalikopan, taas pa kaayo ang panahon aron makahimo og salmot, aghat ni DENR Information Officer Vinesse Shalome Molina didto sa Kapihan sa PIA. (PIA Bohol)  

CORTES, Bohol, June 12 (PIA) -- Minghagit ang mga tinugyanan sa Department of Environment and Natural Resources (DENR)  ngadto sa mga mahiligon og video blogging sa pagsalmot sa labing una’ng Environmental Video Blogging Contest sa ahensya dinhi sa Central Visayas.

Usa sa mga kalihukan nga gihimo aron magtimaan sa ika 32 nga Philippine Environment Month, ang video blogging (Vlog) kinahanglang naa lamang sa 3 ngadto sa 5 minutos, aron sayon ra nga iupload sa social media sites, matud pa ni DENR Information Officer Vinesse Shalome Molina, didto sa Kapihan sa PIA.

Pakontes nga apilan lamang sa mga Pilipino, ang vlog, matud pa sa DENR, kinahanglang magasaysay sa mga labing maayo nga mga bansay aron kakatampo alang sa pagpatunhay, pagpanalipod ug pagpahiuli sa kalibutan subay sa tema nga Protect nature, Sustain Our Future.

Tungod niini, mahimo nga unod sa video blog magtuki sa daghang mga hisgutanan sama sa pagpakunhod sa air pollution, pagpatunhay sa mga kahinguhaan sa limpyo nga tubig, pagpanalipod sa dagat ug sa kabaybayonan, pagtipig sa basura, pagrecycle ug mga kalihukan nga makapakunhod sa epekto sa nagkausab nga panahon, mga binag-ong pamaagi sa kinabuhi nga gaan alang sa kalikopan ug uban pa, matud pa ni Molina.

Basta duna lay mayo nga unod sa presentasyon, nindot nga dagan sa estorya nga sayun og dali rang nasabtan, dili na magkinahanglan pa sa mga mahalon nga gamit: android phone lamang ug maayo nga cut-to cut editing, mahimo na nga maghatag kanimo sa dagkong premyo gawas pa nga ikapakatap ang maayong bansay ngadto sa  minilyon nga nagtutok sa social media ug sa internet.

Ang video blogging mahimo nga Binisaya, Tinagalog o Enigles, ug kinahanglan nga iupload sa personal nga mga social media sites sa partisipante, ug I tag lamang ang DENR Central Visayas.

Subay niini, ang mga mosalmot gikinahanglan una nga mo-like sa DENR Central Visayas sa facebook nga https://www.facebook.com/DENR7Official/ samtang mogamit sa opisyal nga hashtag: #DENR7Envlog2020 ug #PEM2020.   

Ug sanglit ang environment video blog isipon man nga broadcast material, kinahanglang kini mahasubay sa broadcast code mao nga dili tugotan ang pamalikas ug paggamit sa tinampas nga mga pulong.

Ang pakontes magsugod sa buwan sa Hunyo ug matapos sa Hunyo 19, diin sugdan na ang mga paghukon nga magtan-aw usab sa kadaghanon sa likes, shares ug sa comments nga makuha sa entry.

Ang mga entries hukman subay sa originality and content, 30%; entertainment quality, 20%; Clarity of expression, 25%; Visual and virtual presentation, 15%; ug audience impact, 10%. (rahc/PIA-7/Bohol)

source https://pia.gov.ph/news/articles/1044598